المشاركات
- متجوزة؟
- آه
بتحبيه؟
- لأ
- وعايشه إزاي؟
- عادي زي ما كل الناس بتعيش...
نقطة ومن أول السطر...
- متجوزة؟
- لأ
- حبيتي؟
- آه
- ومتجوزتيهوش ليه؟
- عشان مشي ومعرفتش أعيش بعديه...
نقطة ومن أول السطر...
- متجوزة؟
- آه
- بتحبيه؟
- آه
- مبسوطة ف حيااتك؟
- مبسوطة عشان هو فيها
نقطة ومن أول سطر جديد .....
الحياة ممكن تتعاش ب 100 شكل وطريقة بس كلنا بنعيشها مره واحدة وإحنا وحظنا ي حلوة ي وحشة
ي بنعيش وبنموت عادي زي ما كل الناس بتعيش وتموت ي بنعيش وكل الناس تتمني تعيش زينا
العيشة مش بس نفس داخل خارج ولا أكل وشرب ونومة كويسة ولا شغل وأولاد وتربية ومسؤلية
كل دي حاجات حياتك بتدور حواليها بس مينفعش تخلي حياتك تدور جواها فتعيشي وتموتي وإنتي عمرك ما عيشتي
متبنيش حياة مع حد مش بتحبيه لأنك مش هتحبيه.
متستنيش حد مش جاي وتضيعي عمرك وإنتي مستنية.
حتي لو ده كان الواقع غيريه، لففي الدنيا علي مزاجك، متخليهاش تلفك وتدوس عليكي
إطلعي برا كل حاجة بتموتك "عيشي"
طعم النفس بيختلف ألف مرة أما بيطلع فلحظة إنتي فيها مع حد بتحبيه وبيحبك ساعتها حتي لو مُتي "هتموتي وإنتي عايشة"
مش وإنتي مدفونة بالحيا ..
0 التعليقات:
إرسال تعليق